Dr Fahrroddiebstohl (2)

Aenne wahre Begamheet und derzehlt v. Karl Schreiter.

(Schluß.)

Wie iech nooch Älterle bie, ging iech, im racht kurz zu laafen, gleich racht´s dann steiln Fußsteig nauf. Als iech noch su e 40 Meter viern Schwarz-Seeler-Heißl lief, sooch iech schie unner dann seiner Haustir e Glanzladerdach, un vun eener Uniform e paar blanke Knebb schimmern. Is Uwatter hat sich wieder beruhigt, un iech war dorch dos fixe Laafen tichtig in Schweeß kumme. Kochen un Brudeln tat iech wie eener, dar ahm racht gerannt war. Iech dacht in menn Gedanken: „Festnamme leßt de dich nett erscht, de gißt geleich salberscht hie un stellst dich vier.“ Nu bie iech nu na ze dann Pollezeier, dar geleich e paar Schritt mir entgeng gange war, un saht: „Se such´n wuhl dann Fahrroddieb? Dar bie iech!“ Viern Aangblick war´r e bissl sprachlus, un rilbset miech nooch e paar Blickerich ah: „Gehen Sie mit!“ Unn stillschweings bie iech nu nahm dann Pollezeier haargelatscht, bis mer uhm offm Rathaus in enn Zimmer landeten. Iech mußt miech uff enn Stuhl setzen, un kam mir vier, wie e richtiger Verbracher. Zearscht wollt´r wissen, wu iech unnerwaags dos gemauste Fahrrod versteckt hatt. Un wie iech nu derzehlet, dos dar, dar de Pollezei ahtelefoniert hat, mit dann Rod wieder ehemm is, do dacht iech, dar wollt olber warn. Er bläket miech ah: „Wenn Sie vielleicht denken, Sie können mich als Beamten für dumm kaufen, dann werden Sie sehen, daß Sie sich geirrt haben.“ Un nu machet´r mich uff verschiedene Paragrafen aufmerksam, un de Protekolliererei sullt lus giehe. Itze fibg iech nu ah, dos Ding esu ze derzehln, wie´s in Wirklichkeet war. Gelam wullt ´ersch nett, nahm sei Mitz, un gunset miech vun dr Seit ah, denn itze ging´s hie zu dann Ma, wu iech dos Motorrod sult huln. Zearscht frug´r nu dann noch dann un noch genn, un egal esu drimm rimm, des dar Ma ball wußt, im wos´s sich hanneln tat. Wos nu noch alles verhannelt wur, kunnt iech nett härn, denn se warn in enn annern Zimmer gange. Nam mir hatten se enn Maa hiegesetzt, dar aufpassen sullt, dos iech nett ausriß. In darer Stub sooßen su e Sticker 5 Arbeitsbeitsmääd, die miech ahgucketen, als wär iech dr Teifl. Uff emol häret iech, wie där Polezeier im Nahmzimmer telephonieret, un vernom äh e paar Mol ganz deitlich dann Name Hofmann. „Aha“, dacht iech, „itze ward´s schie bei dann Schutzmann ball dämmern.“ Nooch inner Weile kame se wieder, un lacheten. Iech mußt ah lachen, un dar Pollezeier tat sich dann verabschieden. Wos dr Schutzmann telephoniert hatt´, wußt iech nett, un erfursch arscht, wie mir dar Mah dos ganze Getelephonier derzehlt hatt´. De ganze Bud tat sich ver Lachen ball do rim, ball do nimm bieng. Weil nu emol de Pollezei de Händ miet im Spiel hatt´, hot miech där Ma dos Motorrod gar nett nooch dr Schlaate fahrn lossen, denn iech hatt´ doch kenn Fihrerschein, un mehnet, iech sullt mit´n Zug fahrn, ar wullt geleich salberscht nooch dr Schlaate. Iech hatt´ ah genung vun dann ganzen Trödel, un war mei eenz´ger Wunsch: När ehem! Nu nauf nooch´n Bahnhuf. Es war mittlerweile finster wurn! Wie iech bei dar Eisenbaabrick laaf, un im de Eck nimm will, packet miech off emol eens ben Arm ah un saht: „Sie sind doch der Fahrraddieb von Schlettau.“ Warsch wieder e Pollezeier, blus e bissel älter warer wie dr arschte. Su sehr wie iech miech ah verteidigte, iech mucht batteln wie iech wullt, is half nischt, iech mußt miet uff´s Rathaus. Iech sahtsen ah, deß iech arscht vun´ Rathaus kumme, un deß die ganze Sach e grußer Irrtum is, un deß iech vier inner halm Stund schie emol verhaft wurn bie, un deß alle Minuten dr Zug kumme tät, nischt nitzets, iech mußt ahm miet giehe. E Hannelsmaa, dar miech miet´n annern Pollezeier schie gesahe hatt´, blieb trat´n, ruffet gelei noch en annern Maa rieber, un die gucketen miech ah, als wär iech wunner wos fir e Verbracher! Nu riß aber mei Geduld ah ball, un wie iech wieder uff dann Stuhl geknärt wur, wu iech vier innern halm Stund arscht aufgestand´n war, do packet miech dr Senft, un iech tat miech nu verdeiting su gut´s ahm mei Gusch kunnt. Ueber dar schennsten Bläkerei kimmt dar arschte Pollezeier rei, un lachet wie eener, dann se e rachte uhverhoffte Freed gemacht hatt´n! Nochdam die sich nu ausgemährt hatt´n, kunnt iech wieder gieh, un ho dann Treppen nei ball´s Genick gebrochen. Mei Zug war natierlich wag, un iech ho dann zweeten Schutzmann alles mechliche gewunschen, när nischt gut´s. Nu ober ehem! Einen Hunger hatt´ iech gekriecht, des iech do ne Stockholz rei richtige Bäck gestärzt bie. Durch dann Schneemätsch kunnt iech ah nett esu gut vorwärts, un ho iber dann ganzen erlabten Getzen während dar Laaferei su richtig nochgedacht. Su wos kah a när mir passiern, dacht iech! Wie iech nu im Café ahkam, war dar „Älterler“ schie mit´n Motorrod do, un alles, wos ´ne Gusch hatt´, lachet esu harzlich über dos Malör, doß dann ganzen Ohmd vun wetter nischt drzehlt wur, als vun dar Verhafterei. Hier hot sich dos alte Sprichwort su racht schie bewiesen: War ne Schoden hot, braucht virn Spott nett ze sorng!

Schlettauer Heimatblätter. 1. Jahrgang, Nr. 9 v. 15. Mai 1926, S. 11 – 12